Oté

Kan mi di azot nou lé pi toussèl !

Justin / 3 séptanm 2021

JPEG - 43.6 ko

Mézami m’a dire azot in bon nouvèl. Oui pou mwin sa in bon nouvèl : sinploman pou dire nou, kominiss rényoné, nou lé pi toussèl pou domande in shanjman inportan pou noute péi… So matin mwin la lire in lètr 7 parlmantèr La Rényon la ékri lo minist lékonomi laba dan La franss pou dire ali noute péi la bézoin in shanjman inportan dann son lékonomi.

Kossa banna i ékri :

Dovan « une flambée des prix exorbitante concernant les produits d’importation », bande parlmantèr i rapèl« l’impérieuse nécessité de construire une stratégie ambitieuse et rapide d’autonomie alimentaire pour notre territoire. »

Si zot néna in pti tan pou lire lètr-la, lire ali. Sa la pass dann zoinal é mi panss galman dann bande rézo sossyo : zot va oir ladan i anparl konm mi sorte di « lotonomi alimantère »… zot i rapèl néna inn-dé zour noute parti la rapèl son program pou lotosifizanss alimantèr. Zordi bande parlmantèr i ékri lotonomi alimantère, mé d’apré mwin inn é l’ote sé lo mèm zafèr é i sava dann sanss lintéré noute pèp rényoné, dann sanss linréeé noute péi.

Zot i koné ladan néna dë problème : inn i porte dsi noute kapassité trap noute lotonomi é sa mwin lé sir ké oui ; l’ote problème i porte dsi noute statu départman-réjyon. Pou in pé noute statu i anpèsh pa nou trape sa, mwin pèrsonèl mi panss i fo shanj in pé lo statu pou gingn fé in n’afèr konmsa. Bande député-sénatèr i parl pa dsa, mé pou mwin i fo pliss lotonomi pou nou gingn fé avanss lékonomi noute péi bien konm k’i fo..

Antouléka firamézir, sak ni apèrssoi sé ké noute parti lé pi toussèl dsi in bande poinn-vizé i konsèrn noute péi épi noute pèp é sa sé plito in bon nouvèl.