Oté

« Kan moin l’ariv la kaz, momon la antroprann amoin »

In kozman pou la rout

Justin / 25 novanm 2019

JPEG - 43.6 ko

Mésyé, Médam, La Sosyété, koz èk moin sé koz èk in kouyon-sé o pyé d’lo mir k’i oi lo mason. Zot i koné dé zafèr konmsa moin néna souvnans kan moin lété jenn é zot osi mi pans : kisoi in boush ta gèl, kisoi in l’angrènman an promyèr klass, kisoi sinploman in mové rogar é mi pé dir azot in mové rogar sa sé in n’afèr i fé mal. Mi anparl azot momon-poitan lété in bon momon-d’ot i pé anparl azot zot papa, d’ot zot madam-zot gouvèrnman si zot i vé, d’ot ankor zot patron. Lé posib zot i di amoin zot la pa konète daan zot vi in n’afèr konmsa ! La pa toultan demoun i mète aou dir ! Défoi i mète aou dousman, an dousèr si zot i vé. Mé lé drol pars ou i souvien pli fasilman in moman ou lété tromatizé plito k’in moman ou lété dann konfor. Mé zami, éskiz amoin si mi plède la koz bann zanfan, si mi domann azot trète banna an dousèr, avèk intélizans pars in tromatis provoké par la gèl lé dir pou dizéré. Alé dousman avèk mamraye é si i fo parlé, parl mé arsèl pa.. Tap pa non pli. Alé, mi kite azot rofléshi la dsi é ni artrouv pli d’van. Sipétadyé !