Mi koné pa si zot lé konm moin, mé sa in provèrb mi èm – mi diré, mi ador. Pou kosa ? Pars sa in provèrb la solidarité. Nana plizyèr kozman konmsa dann la lang kréol.I di pa « in min i lav l’ot », i di pa ankor « in boushé manjé sa i rofiz pa ! ». Kosa lé pli gayar k’in kozman konmsa dann in péi la konète kosa i lé vant-vid na poin si tan lontan ké sa… Mèm koméla pou désèrtin. Moin mi pans si nout zansète la mète sa dann nout patrimoine popilèr, i fo ni konsèrv ali, é ni fé viv ali toultan ké ni pé. Kosa zot i anpans ? Arien ditou ? Fé travay z’ot koko d’tèt ! Fé bouy z’ot matyèr griz ! zot va oir ké, rant-rant, ni pé z’ète, tazantan, dakor, rantre nou.