Oté

Kan nora pi doboi, kan nora pi dolo, kan do ri sar fine fatigé pousé, nou va oir si larzan-la sa sé in n’afèr i manz

Justin / 2 out 2019

JPEG - 43.6 ko

Mé zami, so matin moin té apré kout radyo dann mon vyé kok loto. Sanm pou moin dann tan vakans la vi lé pli koul é bann zinformasyon-antansyon lakstyalié é l’aktyalité, intérésan sansa amizan par plas an zobok d’ot plas - Donk moin té apré ékout radyo é ala lo zinformasyon moin la antann é mi vé partaz sa avèk zot.

Zistoir-la, in zistoir vré, i rakont lidé in jenn marmaye kameroun la gingné. Pou travèrs lo flèv i fo pran in bak - in sort bato - é konm néna in kantité d’moun lété difisil pou li gingn son tour. Figir azot, zis l’androi li lété apré atann l’avé in dépo la salté é dann lo dépo l’avé in ta avèk in paké boutèye an plastik. Alor li di : si mi gingn fé in bato avèk tousa boutèy plastik, inn m’a gingn travèrs lo flèv dann mon bato épi moin va fé lo résiklaj boutèye pars sak lé bon pou moin, lé bon galman pou mon kamarad épi bann dalon lé asosyé sanm moin dann l’asosyasion lo kartyé mi sort.

Ala ké li mète a fabrik son bato an boutèye plastik avèk boutèye fèrmé néna l’èr anndan épi boutèye fèrmé pou fé lo planshé mon bato-la kord l’asé pou fé sa. Oila ké li fé é kan i la fini li fabrik in pagaye an boi épi li travèrs lo flèv. Konm li oi son trik lé inpékab, avèk son bann dalon li arfé d’ot bato, pli gran, pli pèrfèksyoné é konmsa li pèye pi lo bak pou travèrs lo flèv é an mèm tan li fé lo rosiklaz boutèye vide.

Aprésa li di dann son tète : mi pé fé la kaz osi avèk sa épi lo mir mon ti zardin épi mon park zanimo é tout son bann kamarad i fé konm li é sak zot i fé i rann lo kartyé pli zoli, é la vi pli gayar pou zot.. Astèr konm mi koz avèk demoun i pran larzan pou késhoz néna in gran valèr épi final de kont lo sèl valèr néna dsi la tèr, mi di azot sinploman vi ké dann zot koko zot l’apré kalkilé kosa in bann z’afèr konmsa i raport : kan nora pi doboi, kan nora pi dolo, kan dori sar fatigé pousé, kan la vyann va manké, nora pi in grin dosik nou va oir si larzan-la sa in n’afèr i manz.

Alé ! San rankine mésyé, médam, la sosyété pars moin lé sir avèk bann dalon konm zot épi tout demoun optimis dsi la tèr, lo mond sar kapab ansort ali !