Kossa i ansèrv bann zabèy ? Tout sort kalité zafèr. Nana in nafèr zot i fé dépi k’nana bann plant : zot i gonn bann flèr. Bann flèr i donn bann frui. Bann frui i donn bann grin. Bann grin i donn bann plant. Aprésa, ni arkomans.
Mi souvien kan lavé lépidémi Sikoungounia, in batay la lang la komansé rantr tout moun té i vé pou vréman kalbite bann moustik. In pé té i di konmsa, tié bann salté-la par tout moiyin ! In pé té i di, i fo tié banna mé san tié nout vi. Zordi, ni pé di, so batay la lang i vo la pènn...

Akoz zordi ni antan di bann zabèy i krèv par miliar : i oi pa zot kadav mé zot i sava maron. Zot i sov épi zot i larg zot kaz an plan. Kossa i sava arivé si bann zabèy, lo kont, i diminié ziskatan zot i pé pi viv é zoué zot rol ? Va invant zabèy artifisièl ? Va fane polène par avion ? Va trouv in téknik artifisièl, alé oir nana sak lé natirel - konm na déssèrtin savan, i mank piès dann koko, i kalkil klimatiz la tèr pou anpèsh aèl réshofé.*
Einstein la di : « Kan bann zabèy sar fine mor, lo mond va disparèt katran apré ? ». Dé foi li la tronpé, dé foi li la pa tronpé ? Konm ti vé, ti shoizi !

*Tout sak i raport larzan lé bon !

Justin