Souvan dé foi demoun i aksèp pa fasilman la vérité. Ni koné lo kozman : « tout vérité lé pa bone a dir ? ». Mazine in kou in moun malad é lo médsin i doi dir ali sa, koman li va fé ? Li pé pa ramass mantèr, mé lé pa fasil non pli di la vérité. Donk sak i fo fèr sé prézant la vérité tèl fason ké li lé pa tro dir pou rosovoir. Sé pou sa lo saj afrikin i rokomann sak lé marké an-o la. Lé pa késtyon tranp ali dann in likid i bril pars si la flèsh i fé mal, lo likid i goumant ankor la doulèr. Antansyon, i fo pa konfonn la vérité avèk lo ladi-lafé pars lo ladi-la fé, la plipar d’tan sé in fake new é li lé tayé pou fé mal mèm si li néna in rapor vag avèk la vérité. An plisk’in nouvèl, li transport galman la movèz foi épi la méshansté, la bil, l’otèr lo ladi-lafé. Alé ! Mi kite zot rofléshi la dsi é ni artrouv pli d’van. Sipétadyé !