Konbien foi ou i antan demoun apré di, an parlan déyèr lo in n’ot : li manj patate avèk la po. Sak i vé dir, la po patate la pa lo méyèr morso sré mèm lo pli mové. Solman kan mi di an-o la, si ou la fain vréman, ou i sava pa tir la po patat, ou i manj lo total kapital, pars ou la fain é la pasyans tir la po lé tro for pou ou. Mé antansyon in kou : kan ou i sava vol patat dann manjé koshon ou i pran pa la pène tir la po pars pou ou sa lé éstra mèm sirtou kan ou lé marmaye. Tout fason, kan ou i koz, koméla i fo pran prékosyon pars lé shoz i sava vite. Kosa mi vé dir par-la ? Koméla, ou i antann inn i fé kari la po banane, l’ot i di lo pli méyèr morso dann sitron sé la po, bourjon kann désèrtin i rafol épi néna ankor d’ot shoz. Alé ! Mi kite azot rofléshi la dsi é ni artrouv pli d’van. Sipétadyé !