Loptimis sa in mo an fransé i vé dir pran la vi lo bon koté ; dann sitiasyon ou sak minm si i sa va pa tro bien, ou fé alé kant minm.
Pars la mizèr si la tèr i dat pad zordi ; a nou mouvman politik nou vé sa i sanz ; nou tas moyin fé diminié o moin.

Moin la fine rakonté koman moin la viv dan la kaz an payi.
Moin la vi siklone 1948 (moin lavé 4 an 4 moi), sé dapré moin mon premié souvnir ; mi rapèl nou la sové ; monmon son koté ék mon ti sèr 3 zan 2 moi, in bébé dann bra mi rapèl pi kèl az…
Nou la sot in mir an ros ék papa ; dan in rafal nou la kal dan in kaz ranversé, sinon sa lavé pi lo toi ; dann zéklèr moin té asiz ant lé dé zanm mon papa, si in ros a tèr ; ék son min, dan so kaz nout voizin, -li osi té pi la-, li la trouv in marmit mayi, li dmann a moin si mi vé manz in boul… bon, brèf.

12 zan aprè, moin na 16 zan ; moin la ginyi lo konkour po alé Sindni lékol normal ; nout diréktèr, mésié Maxime Fontaine i di a moin : « di out papa viin war a moin la mézon ».
Donk in aprémidi, nou mont.
Mazine mon vié ék son kilot kaki, pié ni, sapo fètr (feutre). A moin si pli a lèz lo pié a tèr… Diréktèr la i fé rant a nou dérièr son kaz na son biro.

Dialog : « out garson i mont Sindni linterna la, i fo asèt a li dé pizama,dé servièt po lo bin, pantalon, soulié, sokèt, somiz, koman ti sar fé ? »
(ant parantèz, a moin zamé mèt pizama, nou mèt vié linz po dormi ; zamé asèt in servièt, i ésui lo kor ék linz i mèt pi ; lo pié ék sifonn pié ; pantalon zamé koni ; soulié ? ésparsiat ankor, mé sé koué in sokèt ?-sock an anglé !)
Donk papa i fé po répons : « koué va fé, kan ou lé dan la dans, ou dans ! »

 Justin