Mé si wi larg la soss, wi di inn-dé parol anlèr épi wi filosh an zanguiye, la lé pa normal ditou sirtou kan demoune i koné aou, ou sé in om piblik é lo piblik lé kapab prande aou pou in moune i koné pa sak demoune normal i koné.antouléka i konpran pa pou kossa ou la fé in kozman konmsa épi shape lo maye apré. san lèss demoune réponde aou.

Pou kossa mi di sa ?

Pars dann in konféranss néna a popré in somenn téi porte dsi la késtyon shagos é dsi lo zizman la kour internasyonal zistiss La Haye la pran épi la done tor la GB pou la fasson li la pa aplike lo loi dsi la dékolonizassyon épi dsi la fasson bande shagossien lété déporté dann lil moris épi Sésèl avèk lintèrdikssyon rotourn dann zot péi natal. In moune normal a popré informé dann lopinyon piblik rényonèze i koné sa sirtou ké dopi vintyème syèkl bande progréssist rényoné la ansèrv rolé pou linformassyon dsi la késtyon shagoss épi dsi la solidarité-san vanté ni pé di lo pèp rényoné sé lo promyé solidère avèk lo pèp shagoss é shake ané nou la gingn lokazyon prouvé.

Ala ké in pèrsonalité bien konu, touzour apré konbate konte linégalité épi lo sor ankor inzist – défoi rassist-bande rényoné i sibi ankor dann noute péi é la plipar d’tan li néna rézon dann son bande zistèrvanssion mé ala ké so foi issi li domande pou kossa bande shagossien i soufèr in sor konm ni koné dopi 49 zané é sé solman koméla ké bande rényoné i anparl de sa. Lo kou lété inziste épi malonète, pars téi gnor toute sak bande progréssist rényoné i fé an solidarité par rapor bande shagossien.

Son latak té i mérite réponss, mé kan la réponde ali, li té fine filoshé é sa lé pa bien pou in pèrsonnalité konmsa : lé pa normal lo moune i gnor l’aktyalité konmsa, é lé pa normal in lagréssion konmsa. Toussa pou kèl rézilta ? Sinploman i fodra méfyé kan li va pran in pozission piblik pars i konétra pa si li di lo vré, sansa si li di lo fo, si li koze an konéssans de koze sansa sinploman la boush rouvèr…