Mézami mwin la fine di an plizyèr foi néna dé zom politik - ou ex – i ariv pa la shoviye défun Paul Vergès é shak zour k’i pass i amontr anou sak la pa konprande in n’afèr konmsa, la pa konprande bande priorité noute péi. Noute kamarad Paul l’avé konprande li ! Li l’avé bien konprande oussa i lé lo talon d’achille noute lékonomi inssilère bien mayé dann néokolonyaism La franss.

Donk zot i rapèl dann program La Région ziska l’ané 2010 l’avé, an parmi plizyèr poin – lotonomi dannn lénèrji avèk in miks té i konpran lésploitassion lénèrzi solèye, lénérzi la mèr, lo van, sète bande volkan, épi sète lo, ziska trape 100 % lénèrji prope… La pa manké toute in bande shakal la monte la dsi pou arète lo programe la Région.

Zot l’arivé ! Bravo, bravo, mé koman ni lir sa zordi ?

Mi rapèl sinploman la pétission in bande zyé malolé la fé signe pou anpèsh la roshèrch dsi lénèrzi volkan. Lo kou d’pate sal l’edf la done anou dsi lénèrzi la mèr. Lo projé bande kamionèr vantar la fé pou inporte gazoil - in prozé mor dann zèf. La Région dann tan té i vé sinploman kékshoz rézonab : diminyé linportassion bande produi pétrolyé késtyon d’fé ékonomize anou 700 milyon l’éro épi défande bnoute lanvironeman. Mé la bande shakal téi antrovoi pa lé shoze konmsa.

Pou zot lo lintéré privé i pass avan lintéré zénéral.

Zordi kossa i ariv ? Toute bande partizan lénèrzi sal, koman zot i réazi inn foi ké malèr la fine arivé ? Mwin lé sir zot i doi dire sé la fote La Russi ké la parti atake l’Ukraine mé nou lété fine prévoir la késtyone lénèrzi lété konm pagode dann nout pyé é si pagode néna zoli flèr jone ébin son zépine i pike drolman - zordi noute problème sé par la guèr, mé nré pu pète dann d’ote koté pou d’ote rézon. Astèr ziska oussa lo gaz i sava goumanté é ziskakan nou nora ankor ? Ziska oussa léssans avèk gazoil i sava ranshéri é si nou nora ankor lontan ?

Ni koné pa ! Antouléka sak i sar soufèr pliss sé bande ti kolon é bande kominis épi zot zalyanssé l’avé la solission – in solission lo néokolonyal téi vé pa – é gouvèrnman Sarkozy la tranpe dann l’agréssion konte noute pèp… Astèr mi arète in kou ziss pou dir azot, si zot i vé, alé ékoute diskour Didier Robert kan li t’apré détrikote program l’Alyans dann konsèye réjyonal. Sak i vé, i pé trouv ladan la rézon pou ésplike pou kossa k’zot porte-moné lé plate é sar plizanpli plate.

A l’okazyon zot va gingn médite lo ka d’in politik mayé dsi baton la kol la kouyonis é kan ou lé pri la dsi, ou lé bien pri, é napoin pou zoué.

Justin

NB Mi rapèl kan Roland Robert la propoze in gran térin La Possession pou fé in gran santral solèr é kan l’EDF la shoizi la santral lénèrji sal dann Por. Kissa la di kominis na poin la mémoire ?