Lé ga, zot i koné sida-la, sa in salté d’maladi ; épi avan la maladi i déklar, bann malad lé riskab ète séropozitif in bon koup de tan. Donkalor, bann médsin, i konsèy tiliz bann prézèrvatif : i anparl de sa dann télé, dann zournal pou ankouraz bann moun mète prézèrvatif. Konmsa, i gingn pa zanfan si ou i vé pa vréman, épi i protèz aou, épi out mouvman kont virus sida. Ala, in n’afèr d’byin !

Sof k’in l’évèk, la-ba dan la Frans, la fé in drol déklarasyon : pou li, in prézèrvatif i protèz pa in moun san-pou-san kont sida, pars, a s’ki paré, virus sida lé pli pti k’ spèrmatozoïd, épi i gingn travèrs lo manbrane, épi atak demoun par dsou. Bann z’onm de syans la kriy in kou, pars pou zot sa lé pa vré(*) !

Mazine in kou in madam, son mari lé séropozitif épi zot i viv ansanm pars zot i èm. Mazine in pé k’zot lé katolik ! In lévèk, sa sé in moun inportan, normalman sa i koz pa la boush ouvèr. Donk la pèr lé riskab mont déssi inn konm l’ot, i pé mèm pouri zot vi !

Alor, kan ou sé in moun konm in lévèk, k’ou nana in pouvoir déssi la konsyans demoun, ou na poin lo droi di in n’afèr konmsa !

Justin

(*) I prétan l’évèk la konm éskiz ali, li la aport la démanti, mé lé pa tro tar la ?