Lé ga, la plui la tonbé sète ané, tonbé par dsi tonbé. La Météo, ou i diré son diks lé réyé, si tèlman li donn bann z’avi gro plui. La i tonm pi par milimète-la, i tonm par mètr. Alors, dann mon tète, moin l’apré maziné kossa i pé fé avèk tout so lo k’i tonm. Nana zafèr : dabor ramassé, apré aroz zardin, sansa pié kapulèr dann salon, mète de lo dann mashine a lavé san gaspiy larzan, lav la véssèl, aranz inn-dé gayar bassin dann zardin piblik sansa dan la kour d’moun. Si nana poisson dann bassin, moin lé pliské sir bann pti bébète-la va préfèr so lo pir plito k’lo d’zavèl.

Mi ansouvien, in zour, mon papa té apré grongné akoz téi di dmoun, apré in gro tan, ashté d’lo par boutèy, sansa fé bouy dlo robiné. Si dlo i koul pa, apèl Véolia. Alors gramoun téi di : fé tousala, alors k’de lo in tonm déssi z’ot tète. Akoz pa anpar kansréti in kivète olèrk anplégné konm sa. Apré li di konmsa : dolo la plui, moin té i mète dann batri mon loto, sa i ranplas dolo distilé.

Lé ga, laplui va passé avèk lo shanjmann sézon. Biento, nora pi arienk ti farine. Zanimo va tir la lang déor, demoun, tazantan sar dépité oir lo pti pissa i sort dann tiyo. Alors va dir, la plui la tonbé oui sète ané, akoz de lo lé rar konm korn lapin. Oui, lé konm sa mèm : kan ou nana in bonpé in nafèr, ou i gaspiy, ou i kalkil pa lo tan v’arivé ou nora pi an sifizans.

Justin