Oté

« Kan ou néna in marto dann koko, wi oi arienk bann tète klou ozalantour »

In kozman pou la rout

Justin / 26 févrié 2021

JPEG - 43.6 ko

Médam, méssyé, la sosyété, koz èk mwin sé koz èk in kouyon, mé sé o pyé d’lo mir k’i oi lo masson. Mézami, kozman mwin la mark an-o la sa in provèrbe l’afrik-mi panss sa i sorte Gabon é si sé sa, nou lé dann l’afrik ékwatoryal. Toute band provèrb néna souvan défoi in sans prop épi in sans zénéral ni pé apèl lo sans figuiré. Sète-la, i pé pa dir néna in sans prop pars pou di la vérité li prézante in pé konm in plézantri mé sirman néna in sans figuiré : lakèl ? I fé pans amwin lo kozman k’i di, konm wi lé wi ziz lé z’ote, mé mi san kozman-la konm in manyèr de moun néna pou ramenn toute zafèr a zot, sansa o sizé k’i intérèss azot. Si ou lé marto wi pans klou, si ou lé zandarm wi pans volèr, si ou lé péshèr wi kalkil poisson-shassèr wi pans zoizo, lyèv, kanar sovaz. Zot, mon bann zami léktèr, kossa zot i lé ? kossa k’i intérèss azot ? Kossa k’i lé zot zalantour ? Sirman kozman-la in konsèrn azot in pé, si la pa antotalité, par boute sa lé sèrtin. Alé ! Mi kite azot rofléshi la dsi é ni artrouv pli d’van. Sipétadyé.