Mé zami bann zidé la droite souvan dé foi sa lé mové, parl pi. Zot i ansouvien koman prézidan zétazini téi bate dsi son léstoman an parlann lo korona virus. Zot i parl zot ? In sinp grip i fé pa arien l’onkle Sam : dizon i fé konm « lo dsi fèye sonz, zorèye koshon dann marmite poi. » : In sinp pousé é lo virus lété bon pou alé rabiye ali.

Donk kan la maladi l’ariv dann so gran péi démokratik konm Pierre Perret i di, Prézidan Trump la komans par di : fé pa pèrd ali son tan avèk sa. An pliské sa, mèm si in bann résponsab téi pans pa konm li, sa lété asé pou fé mète azot l’arm o pyé konm i di dann l’armé. Dobout guète, zot la atann. Zot la atann !

Mé momandoné zot la konm konprann maladi-la téi sava vir zot po jak. L’èrla in pé téi tir signal d’alarm épi té i di i fo fé antansyon pars si i bouz pa pliské sa lé posib maladi-la i fé plis lo mor la guèr trantnèf-karantsink. Aprésa lo tan la passé, é lo tan so bann losh-la i shanj lo fizi zépol lo ka té fine grav , vèye pa koman. Astèr sé lo péi néna lo plis viktime.

Mé ala in n’ot afèr : zot i souvien Obama l’avé aplik in sékirité sosyal pou tousa bann mon l’avé poin kouvèrtir sosyal é Trump la kass sa kan li l’ariv prézidan. Si tèlman ké kan la makladi la komans tyé d’moun sé bann noir épi bann latino la gingn lo shok an promyé é la pa fini. Zot la vi konm moin laba New-york koman i antass bann mor dann foss komine. An touléka lé pa for pou lo péi i konsidèr ali konm promyé puisans mondyal.

Mé i fo di vite, pars sépa si La chine la pa apré pass dovan li par raport son vilin manyèr l’onkle Sam. M’a di azot ankor dé forfé so gran péi démokratik l’apré fé :
- Inn li la anvoye in flote de guèr pou sèye arète prézidan Maduro, prézidan Vénézuéla é dann sète afèr l’érop lé konplis.
- Dézyèm zafèr kan Kuba la komann bann réspiratèr pou konbate lo korona bann lantropriz amérikène l’avé rashète lo lantropriz la rofiz livré.

Kan ou néna vilin manyèr ou néna vilin manyèr é sa i port pa la shans sa !