Matant Zélida la ékrir Justin.

Mon shèr nové, mon spès salté, rouj-de-fon dovan l’étèrnité, vi koné zoué la pétank ? Ou i koné nana dé zès la-dan, inn i apèl « tir », l’ot i apèl « pointe ». Tir sé kan ou i kass la boul out z’advèrsèr é ou i ésèy an mèm tan fé in karo : tir toi d’la ké zé m’i mète ! Dann la politik lé parèy. Kan ou i pans bann rouj i sava pointé, sé l’èr ké zot i tir… Mèm si sé in kouyonad zot l’apré fèr. I diré, zot i rod tout manyèr pou shap dann kanal. Final de kont, si zot I vé shape, sé z’ot problem. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, i étone ar pa ou si moin lé pa dakor avèk ou, mé tazantan in pé d’tatik, in pé d’éstratézi, i fé pa d’tor, mèm dan la politik konm dan l’éspor. Afèr mi di sa ? Pars kan out z’advèrsèr i atann aou kékpar, i vo myé ou i débark pa par-la. Pars si li atann aou par-la, sé ké li l’a fine prépar son pyèz pou ou é si ou i débark pa par-la, li la pankor prépar in pyèz pou ou é konm di lo kont, i fo zoué avèk l’éfé d’sirpriz. In l’égzanp : kan l’ariv lo zéléksyon rézyonal, in pé l pans parti kominis i prézant pa é z’ot éstratézi, konm z’ot tak-tik té bazé la dsi. In pé té i pans li nora fé l’alyans avèk lo LPA é té i atann ali dann shomin-la é dopi lontan pyèz té paré pou li. Zordi li fé l’alyans avèk lo Progré é sé lo z’advèrsèr k‘i tonm dann kanal. Na poinn pyèz paré ! Na poinn tak-tik paré ! Na poinn éstrayézi paré ! Donk i kriy-kriy in pé, l’inyon kont natir, ! l’inyon kont natir ! mé ni oi bien sé z’ot parad ké lé pa paré : in poin sé tout ! Tok ! Pran sa pou ou !