Médam, Mésyé, La sosyété, koz èk moin sé koz èk in kouyon-mé sé o pyé d’lo mir ki oi lo mason. Zot i koné papang sirman pars tout kréol i koné papang é i yèm bien rogard azot vol dann syèl. I yèm ! Fasonnn parlé pars mi souvien, étan pti, shak foi papang té i vol dsi nout kour, tout marmaye téi kriy : « Papang volèr poul, papang volèr poul ! ». Mé si mi tronp pa papang si li trap zanimo, la pa bann gro poul, sans gro kok, mé la plipar d’tan bann zanimo in pé afayi mé zis do koi pou kontant zot boujaron épi sète z’ot ti famiy. Sa i fé pans amoin bann volèr : zot osi zot i sèye trap zanimo dan la kour d’moun mé la pa dann la kour d’moun bien plasé mé plito dann bann ti-kour par isi par laba, san protéksyon. Final de kont zot lé konm papang, zot i yèm volé san risk é san danzé. Si néna danzé zot i filosh an vitèss. Alé ! Mi kite azot rofléshi si zot i vé é ni artrou pli d’van. Sipétédyé !