An parmi bann zinvité l’avé Elie Hoarau, lo kamarad la kotoiye Paul bonpé d’zané dann sa vi d’militan, é li di touzour sé avèk nout dirizan k’lo pèp rényoné i dovien pèp épi i anpran konshyanss. Sé sak li la di ankor in kou samdi dann son kozman dsi Paul Vergès.

Zordi ni di néna in pèp rényonné, in konsyanss régnonèz, in kiltir rényonèz avèk son listoir, sa lang épi toute bann zéléman k’i fé k’in pèp i dovien pèp é i anpran konsyanss mé konm Elie la di sa lé pa in n’afèr l’ariv toussèl : in gran bataye té nésséssèr pou trap in rézilta konmsa.

Lo poinn dépar lété lo promyé kongré nout parti kominiss rényoné l’ané 1959, mé in poinn dépar sé in n’afèr, mé pou ariv sak ni koné zordi sé kékshoz la pran dé zané é ni pé dir, zordi, la majorité bann rényoné i fé parti d’in pèp rényoné épi zot i rokoné — dizon zot i rovandik — zot fèr parti d’in pèp rényoné, zot lidantité rényonèz..

Fitintan bonpé d’moune, mèm bann résponssab politik, téi oz pa anparl lo pèp rényoné konm zot téi vé pa anparl la lang kréol rényonèz, la kiltir, listoir La Rényon, lidantité rényonèz, é té i falé bonpé kouraz pou proklam in n’afèr konmsa. Elie i koné lo danzé proklam in n’afèr konmsa é konbienn foi Paul la risk son vi pou proklam in réalité konmsa.

A bon antandèr salu !

Justin