Médam zé Mésyé, la sosyété, koz èk moin sé koz èk in kouyon. Mé sé o pyé d’lo mir k’i oi lo vré mason. Mé zami kozman moin la mark an-o la, la pa, d’apré sak mi kroi, in kozman kréol rényoné, mé konm mi di la plipar d’tan, li pé z’ète vré dann nout péi galman. Zot i koné isi shé nou, néna poul é la tradisyon i vé ké li grate la tèr pou li gingn son soso. Kan li trouv in n’afèr, li manz é li apèl pa lé zot pou partazé, sof si èl néna pti poulé é dann in ka konmsa, èl i bate lo rasanbloman. Mé nou lé dann in provèrb nou-la é konm zot i koné lo provèrb néna an zénéral in porté k’i dépass lo sans prop. Dann in ka konmsa kosa li vé dir ? Sinploman ké sak i travaye i gingn son soso é sak i travaye pa i débrouye pa li tro bien. Alé ! Mi kite azot rofléshi la dsi é ni rotrouv pli d’van. Sipétadyé.