Mé si mi rapèl bien, néna in Prézidan Franssé, téi apèl Jacques Chirac la done in l’interview épi dann son kozman li téi di a popré — « On leur a pris bien plus que çà ! » é sa téi éspass in zour La Franss l’avé désside anil la dette plizyèr péi. Biensir in bande réak La Franss, sansa in bande demoune dan l’érèr la akiz ali konm de koi li téi gaspiye bande rishèss La Franss. Mé li té i oi pli klèr ké bonpé é pétète li té inpé pli onète.

Aprésa li mèm lo prézidan aktyèl mi panss li la fine obliye lo fran CFA ou koman La Franss la ansèrv in téknik — Lalmagn nazi la aplike sa dann la franss okipé — tèl fasson lo trézor piblik La Franss i mète la min an passan dsi bande rishèss l’Afrik. Mi panss li lé tro jenn pou rapèl La Franss Afrik, in sistème téi pèrmète roganiz partou bande kou d’éta kan bann gouvèrnman bande péi l’Afrik la sèye fé la konkète zot vré lindépandanss.

Mi panss prézidan-la, i obliye in n’afèr sinp, sak i fé ké si La Franss zordi sé in gran péi sé par son dominassion dsi bonpé péi l’Afrik, osinonsa zot noré té sinploman in péi moiyin… Mi arète la, mé mi assir azot néna dé shoz pou dir é néna ankor in gran shomin pou fèr avan lindépandanss vré bande péi afrikin.

A park sa mi panss lo prézidan i dovré tourn sète foi son lang dann son boush avan d’kozé, osinonsa mi diré sinploman in vérité ké nou téi di étan marmaye : Torti i oi pa son ké.

A bon antandèr, salu !

Justin