Sèrtinnman, pou dirsir in pé lo rol shakinn dann lo gouvernman, ousinonsa zis pou di pangar, dann in vié tan in boug la di konm sa “in miniss kiswa li fèrm son guèl, kiswa li démisyonn“. Pou son dir, pa d’badinaz, pa kilikilik, shakinn i dwa rèss son plass, mé shakinn i dwa èt solidèr linn a lot. Si ou rod pass kal èk li, sanm pou mwin fo dor tar é lèv bonèr, èk li, kiswa i rant dan lo ran, kiswa i travèrs.

Lo minis la zistiss la di mazinn boug la dérnié tan. Dopi yèr li la anvoy son démisyon pou lo prézidan. Lo bri té i kour dopi in bon koup do tan, vik na pi lantant rant zot. Lo madam, pa di zanr a tro lèss a li fèr, konm di mon ti fyi dérnié, li lé plito konm zézèt, li nan fé ka sa tèt dapré banna. Sépousa i pouvé pa tonir tro lontan. Alorss, komantèr i fiz konm pétar. In délivrans pou désertin, in kosmar pou dot.

D’si in bon pé d’sizé, zot té i kad pi. Mi yinm byin lo kozman lo miniss aprésa, li di konm sa “mandoné rézisté sé résté, mé mandoné résisté sé partir“. In, mi vann konm mwin la ashté, i prétan té i rèt son tousèl konm in pé a gosh anndan la. Dawar lé vré, vik, la drwat èk lékstrinm drwat i bat la min éstèr. Lé vré, kan ni akout lo madam ni wa sé in moun néna konviksyon, konm si li té pa a lèz èk banna, pou mwin li lé konsékan èk li minm, vik sad li pans i kad pi èk sad li fé, li démisyonn !