Eskiz mon pardon, mé la pa pou kass tiboi-la pa par malis !- mi di kékshoz konm sak zot i pé lir zordi dann mon modékri. Kosa mi sava di moin la ? M’a dir azot moin la suiv laktyalié éléktoral dopi moi d’mars ziska zordi, sirtou bann portré moin la vi in pé partou dsi bann program zéléksyon é kosa moin la romarké d’apré zot ?

Moin la romark in bonpé sak i okip lo péizaz politik, la pass par parti kominis in pé lé ankor la é d’ot la fé troi pti tour épi s’an von. L’èrla, mi domann amoin pou kosa so troi pti tour épi s’an von. Pars kan zot lété dann lo parti, kan zot téi koz, kan zot téi ékri, moin l’avé konm l’inprésyon zot téi kroi sak zot téi di, épi sak zot téi ékri, kosa zot téi pans é la plipar d’tan lété bann zidé, bann mo, bann rovandikasyon nout parti. An toulé ka, moin la zamé antann azot anparl in divèrzans avèk nout parti.

Alor, pou kosa, konm kréol i di, zot la pran zot partikilyé, sansa zot la ralyé avèk bann formasyon la zamé di zot lété kor avèk nout parti. Alon bien romarké, nout parti, d’apré sak mi koné, i mète pa lé zot dan l’obligasyonon ète dakor san pour san avèk li : sof a ète dakor dsi bann prinsip épu lo grann lign nout program. Ni pé an avoir désèrtènn diférans mé konm i di, lé pli proférab sak i raprosh anou lé pli inportan ké sak i diviz anou.

Alor si nou lé dakor dsi bann zidé, dsi lo program, akoz ni antann pa, akoz ni alyans pa, akoz ni fé pa in l’inyon pou gagn bann bataye lé nésésèr pou ranporté dann sans l’intéré nout pèp. Akoz ni konbate pa la mizèransanm ? Akoz ni konbate pa ansanm pou la sékirité alimantèr é pou lotonomi énèrzétik. Akoz, ni konbate pa ansanm pou nout prop dévlopman ?