Mésyé, Médam, La Sosyété, koz avèk moin sé koz avèk in kouyon-o pyé d’lo mir i oi lo mason. Défoi demoun i di zot néna in liv shové : mi pans sa in liv zot i lir souvan défoi pars zot i trouv ladan lésplikasyon zot la bézoin kisoi pou trouv la solisyon in problèm zot i poz azot, kisoi pou ède azot a siport in traka k’ i rovien toultan. Lé sir si zot i trouv zot kontan ladan, lé bon pou zot pou kontinyé lir ali pars an plis shak foi zot i lir in paz sansa in shapite zot i trouv dodan in bann nouvo zafèr. Mé momandoné zot i trouv pi arien pou kontinyé intérèss azot, l’èrla i fo pran in nouvo liv. Mé o fète kosa sa i vé dir par raport nout vi ? Mi pans par moman i fo sinploman shanj de vi si ou i trouv pa in nouvo sant pou intérèss azot. Mi rapèl in gramoun in zour la di amoin, li vé arète viv pars la vi i aport pi ali arien é kan moin la antann son nom dann désé, sa pa pa étone amoin : la routine l’av fé mor ali. Alé ! Mi kite azot rofléshi la dsi é ni artrouv pli d’van. Sipétadyé !