Na dé-troi zour, moin la antann in moun dir, li domann ali bien si program nout parti i kol bien avèk sak i fo fèr pou La Rényon dann in ka konm sak ni koné. Na inn la réponn, li pans sé lo program k’i fo pou La Rényon, zordi épi domin, épi apré. I fo dir galman, so késtyonman té i vien apré in kozman dsi l’éta nout péi lé randu. Ala k’in n’ot i di, son tour, sé lo bon program si bann Rényoné i pans sé lo bon program.

Sanm pou moin, ala lo késtyon prinsipal. Pou kosa ? Pars si bann Rényoné lé pa dakor avèk, i ansèrv de riyin kas son tèt pou fé in bon program ékonomik, sosyal, l’anvironmantal, épi kiltirel... Mi pans mèm, si bann Rényoné lé pasif dovan lo program é si zot lé pa paré pou in mobilizasion, kas son koko, sa i ansèrv de riyin. Zot i koné, moin la kotoiy in bonpé kamarad. An parmi l’avé mèm bann résponsab, é malorozman, moin lé pa sir zot lété dakor avèk program nout parti. Moin lé mèm sir zot lété pa la avèk sa. Zot lété pa la avèk lo tram-trin, zot lété pa la avèk MCUR, l’otonomi énèrjétik té i dig-dig pa zot doi d’pyé. L’otosifizans alimantèr, arvoir Pyèr ! Tanka la rout litoral kat voi, sis voi, inn an plis inn an moin, i arsanm, la pa lo traka d’sisya.

Boudikont, sak mi pans, sé k’i sifi pa martèl in mo d’ord, pars mèm si demoun i fé sanblan zot lé dakor, zot lé pa pou vréman, é dann in ka konmsa, lé shoz i avans pa. Zot i konpran pou kosa, aprésa, bann problèm pèrsonèl i pran in l’inportans k’i fo pa. Shoviy gonflé i ranplas l’intéré lo pèp rényoné.

Justin