Matant Zélida la ékrir Justin :
Mon shèr nové, mon spès salté,
Kan moin la antann prézidan la Shanm de komèrs parl dann télé, moin té kontan. Fransh vérité ! Ala in moun i di la vérité pou vréman ! Kan bann rouj-de-fon i di sak zot i di dsi bann difikilté La Rénion i koné, li réponn sinploman : sa sé la kriz, é la kriz-la, pèrsone la pa vi sa arivé. Kan bann rouj-de-fon i di sé pars la pa fé lo bann réform indispansab a tan, li réponn : sa sé la kriz, é pèrsone l’avé pa vi sa vnir ! Donk, moin mi konsèy azot ramas dann magazin zot vié z’idé i pass pi. Ramas dann magazin sak zot i répèt dopi tan é tan d’zané. Prézidan la Shanm de komèrs la di épi la bien di : sa sé la kriz, sa lé mondial, sa i tap toulmoun, é pèrsone té i pé pa prévoir ali. Tok ! Pran sa pou toi !

Justin la fé pou répons :
Mon vié matant k’i koz touzour la boush rouvèr,
La kriz i tap toulmoun, èl lé mondial ? Figir aou matant, ziska zordi, l’il Moris la pa konèt la kriz. Ziska zordi, bann péi émèrzan la pa konèt la kriz : ni l’Inn, ni la Shine, ni l’Indonézi, ni Singapour, ni la Thaïland, ni l’Almagn, ni Péi-Ba, ni l’Erop di nor. Toulmoun ou i di ? Sof in pé, sof mon réspé. Té i pé pa prévoir ? Akoz kan in pé partou, bann rogardèr atantif l’ékonomi mondial té i tir l’alarm, gouvèrnman fransé té i fé konm si arien n’été ? Pli pir, la dispans bann rish pou pèy l’’inpo, épi, par l’fèt, la agrav la dèt. Arzout èk sa, isi mèm, isi La Rénion, kan Paul Vergès la fé tout in plan pou sèy pas par dsi la kriz, pou évit tanpir k’i pé shomaj. Ou i souvien la MCUR, lo tram-trin, la rout litoral, prolonjman la rout Tamarin, la politik konstriksion bann lisé, lo plan pou Er-ostral ? é bin, sa i vé dir, in pé l’avé antrovi la kriz. Donk lété pa si inprévizib ké sa...
Arzout èk sa, ni pé dir osi, La Rénion la bézoin in paké réform : ni koné bien nout maladi, nout poinn féblès, nout pié d’kèr, é pa zordi pa domin, i fodra fé bann réform-la. Zordi i di, tout l’ékonomi La Rénion lé riskab éfondré ! Dakor, mé gouvèrné, sé prévoir, é prévoir, sé konèt la kriz i ariv... Kan siklone i ariv, ou i klout out fénèt, ou i klout out port, ou i garanti out bann tol kont lo van, ou i ramas out z’animo, ou i fé provizion d’lo, la bouzi, pil pou mèt dann radio... Si ou la pa fé, ou i sa gingn dézagréman. Tok ! Pran sa pou ou !

 Justin