Oté

« Kan vaz la fine kasé, kosa k’i ansèrv grongn ankor marmaye ? »

In kozman pou la rout

Justin / 4 novanm 2017

JPEG - 43.6 ko

Souvan dé foi, bann momon épi bann papa i grongn bann marmaye, si zot i pans banna la mal azi. Na dé foi, dann mon kèr, mi domann kosa i ansèrv grongn marmaye konmsa sirtou avèk la kolèr ! Mi profèrré in réprimann, konm i di, in z’ésplikasyon pou fé konprann bann marmaye kosa lé posib fèr, é kosa i fo pa fèr. Lé vré nana désèrtènn règ i fo réspékté kisoi dann la vi famiy, kisoi dann la vi an sosyété. Sansa i dovien bien difisil pou viv an parmi… I fo pa, d’apré moin, la rolasyon rant paran épi zanfan i vien konm in zé d’pongn, in manyèr d’voir kisa va pliy la tète dovan l’ot, kisa k’i gingn é kisa k’i pèrd. Alé oir, konm i di, la vi dann in famiy sé konm in l’aprantisaz la koégzistans pasifik. Sa i vo pou l’ékol, sa i vo galman pou la vi dann la sosyété, sa i vo galman dann la rolasyon rant bann péi. Alé ! Mi lèss azot réfléshi la dsi é ni artrouv pli d’van sipétadyé.