Gouvèrnman-la i pran anou pou in bann koulou. Sa lé pa nouvo ! Son bann valé sir plas i pran anou pou la mèm shoz. Sa galman lé touzour parèy. Mé na in n’afèr mi ariv pa ankésé, sé lo zé bann sosyalis l’apré zoué. Mi konpran pa pou kosa, apré an avoir domann anou, PCR, nout manyèr oir lé shoz pou tir nout péi dann sou-dévlopman, sanm pou moin i tienbo pa kont nout z’idé la dsi. In pé i di, sé pars bann sosyalis, isi La Rényon, pou la plipar lé in pé boushé, in pé manipilatèr avèk solman dan la tèt l’anvi amontr zot lé pli for ké nou, dann z’éléksyon.
Biensir i pé oi lé shoz konmsa, par lo pti koté la long-vi. Biensir i pé di, konm d’apré zot, PCR sar blizé fé vot Hollande, zot i tienbo anou konm i tienbo bèf avèk in kord. Mové kalkil, si sé sa zot i majine ! Pars sha shodé la pèr lo mèm kan li lé fré, é la pa arienk zordi nou lé shodé. Donk v’ariv in zour nou lé riskab dir, antansyon, out propozisyon par sèrtin koté i arsanm pipi lo sha, é nou lé si tèlman dan la difikilté ké ni pé pi kontant anou avèk sa... Mové kalkil pars nout sityasion lé tèlman dann malizé ké nou la bézoin ansort anou, é konm ni éstim sé par la fot l’Éta nou lé dann malizé konmsa zordi, i fo l’Éta i èd anou pou vréman, sèryèzman, pa pou fé sanblan.
Mové kalkil ankor kan i suiv sondaz. Lé vré, in sondaz i fé pa in z’éléksyon, mé i fo pa oubliy Front la gosh i mont é li an parl lo trin, lo tram-trin, li parl galman l’otonomi dan l’énèrzi, é li trouv pa kouyon nout l’idé bann z’anploi la proksimité é bann vré l’anploi dan l’anvironman. Arzout èk sa, li la bien lir nout projé é li la réponn vit é avèk la présizyon. Pétèt bann partizan Hollande i kas pa la tèt anpèrd kèk dizèn milyé lo vot promyé tour. Pétèt, mé moin lé pa sir ! Pars promyé tour i anons dézyèm sa kèkfoi, donk tansyon pangar !
Arzout èk sa, ni dor dsi in volkan, é kan li va pété, li va fé déga. Sa lé sir ! Sa lé vré ! Sa sé la vérité vré !

Justin