Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Accueil > Chroniques > Oté

Kan wi grinpe dsi pyé d’boi, pran prékossyon mète in kilote prope !

jeudi 10 mars 2022


An parmi bande péi loksidan néna in bande bon donèr d’losson. Si i kroi azot napwin pli réspéktyé lo droi internassyonal tou kour épi lo droi la dékolonizassion ké zot. Napwin pli partizan d’la pé rante bande pèp ké zot mé sak lé pa dakor avèk zot i mérite in gran shatiman…


Poitan la pa bézoin an avoir in mémoir zéléfan pou romarké zot néna in mémoir bien séléktiv : sé konmsi zot la fine obliye toute zot forfé é zot i doneré azot lo Bondyé san konféssyon é lé zot ré konm lo dyab an pijama.

Astère ni pé anparl l’Irak é la dézyème guèr bande zalyé lokssidan la fé dann péi-la, pars parétil Sadam Hussein l’avé bande zarm déstrukssion massiv é li l’avé pwin, boudikonte. Mé boudikonte lo péi ziska zordi lé touzour détrui.

Astère ni pé rapèl la Libye épi lo kolonèl Kadhafi. Mor dsou lé bonb bande zarmé oksidantal é zordi lo péi i ariv pi a trouv son linité é li lé divizé rante bande fakssyon.

Ni pé galman anparl Lé Chagos : in popilassyon déporté pou fé la plass in baze militère an vyolassyon lo droi la dékolonizassion.

Ni pé ankor anparl la Palèstine dévasté par Israël avèk la bénédikssyon bande grande puissans é larm nikléère braké dsi l’Iran.

Ni pé anparl bande zil éparss dann kanal Mozambik. Kissa i lé son proprityétère ? Si la pa Madégaskar an aplikan konm k’i fo lo droi la dékolonoizassion. Poitan La Franss i di sa lé aèl é lo prézidan i sava deklare sa dann banzil-la.

Biensir mwin la pa pou la guère rante la Russie épi l’Ukraine é mi panss pa inn é l’ote i pran lo méyèr shomin pou ariv a konstruire in monde de pé. Kossa v’arivé, mi koné pa mé sak mi oi sé ké lo bande donèr d’losson nora myé fé d’aplike azot par zot même zot bon lésson é konm mwin la marké an-o la : kan wi grinpe dsi pyé d’boi, ou néna intéré mète in kilote prope é sirtou – é sa lé vré pou toute.

Justin

Nb Mwin la pwin la prétanssion drèss in list vyolassion lo droi internassyonal mé mi pé dir dopi 1945 la pa sa k’i manke.


Un message, un commentaire ?

signaler contenu


Facebook Twitter Linkedin Google plus