Matante Zélida la ékrir Justin :

Mon shèr nové, mon spèss salté, rouj-de-fon dovan l’étèrnité, mwin lé a d’mandé pou kossa wi rakonte toussa balivèrne-la é oussa sa i sorte dann lizine oute koko apré mouline san aré. Zordi wi parl listoir pou la Rényon : LISTOIR an majuskul alé oir pou mwin La Rényon la poin listoir mé solman zistoir, konm èl la poin d’KULTURE mé sinploman in folklore, épi noute soi-dizan LANG Kréole sé arienk in patoi. Toussa pou dire nou néna noute LIDANTITÉ. Anfin mi di é mi rodi avèk ou in mansonze répété mil foi sar zamé in vérité. Noute sèl lidantité sé lidantité franssé. Tok ! Pran sa pou toué !

Justin la fé pou réponss :

Mon vyé matante k’i koze arienk la boush rouvèr, ala in kozman i rogarde aou, mé i étone pa mwin de ou. In foi anpliss. Si ni anparl solman listoir, noute dë ou i pouré roganize in sobatkoze-in déba si wi vé – mé a la fin d’la finission ou noré touzour oute poin d’vu é mwin mon poinnvizé é ni pouré kontinyé l’ote koté d’la vi a diskite étèrnèlman san zamé z’ète dakor ou épi mwin.

Mi rapèl aou kant même sak in vyé saze L’Afrik téi di. Li téi di konmsa ; si wi koné pa oussa wi sava kalkile in pé oussa wi sorte é sak va donn anou la klé kékshoze konmsa sé listoir pars néna arienk listoir lé kapabe fé mirak konmsa : amontre anou lo shomin nou la fé dopi lo komansman é lo shomin nou la suiv pou amenn anou oussa ni lé zordi, é oussa ni sava domin.

Fassil, difissil ? Difissil a tou lé kou konm mwin la ékri yère dann zoinal, pars ziska zordi listoir nou vré listoir lé pa ankor ékri san pour san sinploman, syantifikman é néna ankor bonpé shomin pou fé pou bonpé zénérassion k’i vien pou trass lo shomin i amenn anou dopi noute yère, pou amenn anou dan noute zordi, é pou alé ziska noute domin.. Tok ! Pran sa pou ou !