Mézami, sépa si zot i koné in kozman konmsa pars sa la pa in kozman abityèl shé nou, mé afors rogard télé ni fini par pans sa késhoz i pé konsèrn anou pars ni konpran bien avèk lo poi banna néna, avèk la fors zot i mète dann in bagar, ni pé konprann ké zot i kraz tout sak lé otour d’zot sirtou sak lé pti-isi sé zèrb mé mi pans sa i pé aplik tout sak lé pli pti ké bann zéléfan é k’i pé pa mète azot a l’abri. Astèr, konm sé in provèrb, ni pé sèye konprann kosa sa i vé dir. Alon mazine dé gran péi i désid fé la guèr, l’èrla ni konpran bien bann pti voizin lé bon pou soufèr. San parl la gèr, si néna in konkirans rant dé gro sosyété pou finir, zot i pé antann inn avèk l’ot é bann ti kolon ladan sé zot k’i sibi. Alé pa f é lalyans avèk inn kont l’ot pars a la fin dé fin sé ou k’lé fouti. Alé ! Mi kite azot rofléshi la dsi é ni artrouv pli d’van. Sipétadyé.