Ni koné Groenland sa sé in téritoir i apartien in péi l’érop di nor i apèl Danemark. li néna son prop lotonomi é lo pèp sète androi la zamé di li vé viv dann in téritoir zétazinien. Konm Danemark la zamé di li vé sède son téritoir.

Ni koné Danemark sa i fé parti d’lérop é li domann bann péi éropéin pou souténir ali dann in konba inégal.L’érop ? Zétazini i s’anfoutsa pars sak i kont pou li épi pou son prézidan sé lintéré égàiss bann zamérikin in pwin sé tou.

Biensir La franss lé shèfantète dann la défanss Danemark, mé zétazini i aksèp pa i tienbo tète avèk li é ni pé dmandé kossa lé riskab passé. Zétazini i vé ashté Groenland é si i vé pa vann ali li ménass anvoye son larmé é i rossanm arien i pé pa arète ali.

Mé zot va dir amwin kossa nou néna afèr dann in dézord konmsa. Mi réponn azot pars lo Prézidan amérikin néna in moush o plafon é ni koné pa avèk li koman lé shoz i pé tourné… Ni obliye kant mèm pa la baz Diégo-Garcia lé pa loin par rapor anou é kossa Zétazini i pé déssidé.. Sirman kan La franss i mète anou dann in zé konmsa — vi k’ néna in projé d’baz miltèr shé nou — mwin lé a dmandé si li soussyé nout zintéré.

A biensir konm mon papa téi di i fo kriye avan k’i fé mal é toute bann roprézantan La Rényon i dovré fèr azot in pé d’soussi.. Zot i rapèl kan Trump la rogoumante bann taks dsi nout bann produ. Inkroiyab li la panss anou ! i. Apré li la éfass sa, mé ni dovré kant mèm rouv noute zyé.

A bonantandèr salu !

Justin