Médam, Mésyé, La Sosyété koz èk moin sé koz èk in kouyon mé sé o pyé d’lo mir k’i oi lo mason. Mé zami, mi pans zot i koné zourite mé mi koné pa si zot la fine oir ali dan la mèr apré vide son posh bouyon noir. Kosa k’sa i ansèrv ? Sinpleman in téknik défans : Kan zot i pène la mèr an noir, zot l’ènmi i oi pi azot é kan la mèr i arvien klèr zot la fine disparète. Astèr, alon kalkil si in téknik konmsa i pé sèrv an sosyété : mi pans oui, pars si ou lé agrésé é si ou na poin moiyin pou réponn tout suit ébin i vo myé ou i rotiraou pou arvni apré dann méyèr kondisyon. Mé antansyon la fuite pou arni apré sé inn, mé dovan out prop résponsabilité é mète l’otèr dsi lé zot. Néna in nom sa. Sa i apèl rode in boukémisèr : la pa moin, sé l’ot. Bann marmaye lé for pou fé sa, mé zordi bann dirijan bann gran péi i fé parèye. Zot i pran pa lo dispozisyon k’i fo a tan, é kan l’anmèrdman i ariv zot i défos dsi lé zot. Alé ! Mi kite azot rofléshi la dsi é ni artrouv pli d’van. Sipétadyé.