Médame zé méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo masson.

Mézami, zot i koné kari kanar sa in kari vanté sa mé son gouté i dépande son kalité : wi pé fèr in kari kanar pékin, sansa in kari kanar maskarin, mé lo pli valabe lo pli gayar pou kuiziné sé lo kari kanar batar. Biensir sa i dépande galman lo tour d’min lo kizinyé, sansa la kizinyèz, mé sa i dépande galman la kalité kanar ou la pran pou fé oute kari.lo méyèr, lo pli gouté, lo pli gayar sé kanar batar, bien bouré avèk mayi an grin bouyi. Pétète bande jenn i ansouvien pa, mé bande zansien i pé dir azot koman dann tan té i bour lo kanar, kissoi a la min, kissoi avèk latonoir (latonoir, lantonoir sa topète morète boi d’zalimète). In bon somenn konmsa é la vyande lé paré, lé prope, bien nétoiyé, bien graté konm ki fo avèk son méyèr gou, é lé bon pou koupe kolé.

Mi arète-la pars sansa zot lé riské d’kroir sa la pa in provèrbe inn-mèrde. Poitan si, batar sé la plipar rante nou, kan in bande demoune la sorte partou la rankontré, la kroizé, pou fé lo pèpe rényoné : batar sé nou, sé nou é noute batarssité. Sa sé noute kalité si ni yinbou aksèpte anou konm ni lé.

Alé ! mi kite azot rofléshi la dsi é ni artroubv pli d’van. Sipétadyé.