Lé bien domaz nou lé an iver é si mi parl la kanikil sé pa pou nou koméla La Rényon, mé sé pou sak bann fransé i sava santi pasé.. I prévoi pou somenn isi bann tanpératir ziska karant dégré dann l’onbraj ; dann bann mézonn rotrète lo minis i tir signal d’alarm ; li di konmsa i fo mète bann vyé épi bann malad dann in kartyé afréshi. Dann désèrtènn komine i di bann jenn alé oir bann vyé é sirtou vèye si zot la pa apré anval zot kuiyèr an dous.
Minis l’édikasyon nasyonal son koté la distribyé in sirkilèr pou gard bann marmaye lékol dann l a fréshèr. Dann la fréshèr ? Bann amontrèr lékol lé paré pou domandé si bann minis i koné vréman koman lékol lé ankor dan La Frans. Mète marmaye dann la frèshèr ? Mé ousa i lé so fréshèr-la. Donn azot lo frèsh pou boir ? Ousa i gingn sa dann bann komine pov. Avèye termomète ? Méla plipar d’tan la poin tèrmomète dann bann klass é mèm si noré lé pou ansèrv kosa ?

Mé zami La frans-la sé in péi rish épi in péi dévlopé dakor avèk moin ! Mé lo bann zékol lé bien mal fouti. I paré, d’apré sak mi antann La frans lé pa ékipé pou la fré é pou la nèz, mé èl lé pa non pli ékipé pou la shalèr. Alor, pou kosa èl lé ékipé ? Pou fasilite la vi bann milyonèr ? Pou dévlop léspor i apèl la fuite bann kapital épi tout sort de shoz konmsa.
Mé zami, dopi moi d’novanm ziska moi d’mars, bann marmaye La Rényon la sibi la shalèr é dann désèrtin létablisman té in kalvèr pou bann zékolyé konm pou bann amontrèr. Banna la fé lékol konm zot la nyabou é malorèzman mi oi déza d’isi la finn l’ané i sava shofé ankor é san solisyon, konm l’ané dèrnyèr é konm débi d’lané. Na poin in plan pou lékol ? Pa ditou d’apré sak i paré é si na poin in plan pou La frans, na poin non pli pou la Rényon.

Poitan isi konm laba i koné i fo pran la kanikil an réspé. I koné, mé i fé pa é la pa d’zordi lé konmsa.A zizé an plis avèk lo réshofman klimatik !