Mwin pèrsonèlman mi panss si in katastrof konmsa i ariv,la pa par in sèl siklone, mé par rapor in movèz politik apliké dopi plizyèr dizène z’ané dopi la konfiskassion la kann épi son bann ko-produi par bann zizinyé an zot favèr-avèk la konplissité ladministrassion- épi lo san konprann bann gouvèrnman La Franss .

Na pwin tro lontan la fé in zassiz dsi la kane épi banna la pass inn-dé zour pou sèye trouv bann solission pou sov la kane .Lo zassiz la passé é konm dabitide nou la pa vi prézante in program valab pou romète anlèr in prodikssion si nésséssèr pou noute péi..

Dabor i fo ni di késhoz : assé ékoute toute in bann demoune apré dir i fo arète avèk kann pars soi-dizan noré pi lavnir pou li.Sak i di sa, mi sipoz zot i koné pa –sansa zot i vé pa konète-kann sé in prodikssion pou lavnir La Rényon :

Pars kann sé pa solman dosik mé galman toute in bann koprodui i pé tir dan li épi sé mèm la baz noute indistrializassion dan noute péi si in zour i amenn in politik sèryé pou donn la valèr noute prodikssion.Apré sa, i fo mète toute lo sistèm dsi la tab épi rolanss in vré politik kanyère pou La Rényon.

Mi arète la pou linstan, pars bann léktèr noute zoinal dopi dé zané é dé zané i koné kossa noute zoinal la ékri la dsi si ni vé dévlop in politik énèrzik épi révolissyonèr par rapor la kane .

A bon atandèr salu !