Oté

Kann, in plant lé bon pou fé tout zafèr ansanm !

Justin / 10 out 2018

JPEG - 43.6 ko

Mon bann dalon, si mi anparl azot kann ankor in kou, pés fèr zot sar pa tro kontan avèk moin mé mi doi dir azot mi yèm bien partaz sak pou moin sé in bon nouvèl. Mi èmré bien bann sindika plantèr épi bann plantèr zot mèm é akoz pa bann rényoné i tonm dakor avèk moin dsi in n’afèr konmsa. In n’afèr mi pé apèl : nout lor vèr anou rényoné.

Moin lé fine ékri sa pars sa sé in souvnir mi gard dann mon kèr dopi étan pti. In zour Doktèr Raymond Vergès la vni mon kaz-anfin la kaz mon bann paran - pou rann anou vizite. Pa pars nou lété inportan dann nout vilaz mé pars i diré vyé doktèr-la l’avé in vré l’amityé par raport mon papa. Félix téi dévir pa son do avèk son bann kamarad épi son bann zami.

Donk mon papa lété rousté pars l’izine La Mare téi pèye ali par shikète, zamé in bon some an mèm tan. Donk li téi di : banna na ka ashté mon kann in sèl kou in poin sé tou pars konm téi fé té i pé pa marshé. Dosik in zour ! Lo ronm in n’ot zour ! L’alkol in pé apré ! Apré ankor la mélas épizapré d’ot shoz ankor. Dé zan pou pèye in rékolt i fé pa in n’afèr konmsa !

Doktèr Vergès l’avé bate karé in pé partou é d’apré sak moin la tandi dir li té in vré savan é l’èrla, pou kalm mon papa li la di : Félix néna tro produi dann kann pou priv bann plantèr d’sa. Lo pov doktèr té i koné pa Zanpol Virapoullé lété ankor dann rin son papa mé li té i doi vni l’onm a tou fèr ni koné dopi in paké d’zané, lo bradèr z’intéré bann plantèr.

(samdi nou va oir la suite)