Mi pouré site azot in bonpé problèm, mé zordi m’a kontante anparl kann : toulmoune i koné lé shoz i pé pa alé konmsa san k’i trouv in bon solission définitiv. Na poin lontan mwin la antand Prézidan la chanb lagrikultur dann télé. Zoinalis i poz ali in késtyon dsü l’avnir kann issi la Rényon épi i di ali « kann na pi lavnir ». Li répond : « Kann néna in l’avnir mé pétète pa dann suk solman. »

Mi pans konm prézidan la shanb épi sindikalis, lo ga i koz pa la boush rouvèr, li koz konm i di an konssans. Si li koz konmsa, mi pans néna pa mal demoune i koz konmli. Donk sa sé inproblèm de fon é li doizète trété konm in problèm de fon.

An gro li la bézoin d’in roganizassion, d’in dévlopman, d’in divèrsifikassion pétète, é pliss va fé sa bonèr, opliss la roganizassion sar éfikas épi sar bon pou l’avnir toute le moune i viv avèk kann épi tou otour., é sar ossi san doulèr. Pou linstan i pran pa lo problèm a bra lo kor konm i dovré. Si kann i mérite in rokonvèrsyon ébin i fo fé avans rokonvèrsion-la. Mé sirtou i fo pa lèss lé shoze alé konmsa an dégréné. La pa sèryé ! la pa éfikass.

Demoune résponsab i badine pa konmsa avèk in problème lé inportan konmsa.

An atandan, l’apré éssèye négossyé pou trouv in solission bazé dsü dosik prinsipalman é pou troi katran é lé dür pou akoushé. Akoz pa rouvèr lo dossyé dovan bande fors viv noute péi é noute pèp rényoné. Ala pétète in solission !

A bon ékoutèr, salu.

Justin