Oté

Kann ! Kiltir vivriyèr ! Do ri konm kiltir éstratézik : nou va an roparl de sa

Justin / 24 zwiyé 2018

JPEG - 43.6 ko

Na poin lontan moin la antann in sindikalis plantèr Sintandré. Ali, avèk son bann kamarad té apré grévé Boi Rouz pars l’izine vapèr i fonksyone pa donk l’izine kann i suiv ali galman. Rézilta : i pran pi kann dann l’izine Boi rouz é lé konmsa dopi la koup la komansé : dé zour i liv kann, dé zour i iv pa, in somenn i liv, n in somen n i liv pa. Si tan tèlman ké kann bann plantèr i pèrd son sik dann karo, kisoi par la séshrèss, kisoi ankor par l’égrèr li ramasss dann shan.

Arzout èk sa déga siklone : trant karant pour san d’pèrt késtyon rannman dann shan é pi pou lo sik, i fo kont lo mèm tarif. Mé la pa sa mi vé an parlé : bien sir kan ou néna afèr in bann moun inkonpétan, i fé pa sak i fo pou fé tourn l’izine normalman, ou lé bien annuyé, é kan in pé i di aou, i fo arash kann épi plant légime, karote avèk ponm tèr, é kan ou lé pa sir ékoul out marshandiz lo plantèr i di li lèss sa pou lé zot, pa pou li.

Sanm pou moin boug-la avèk so teeshirt Che Guevara na rézon konm pa. Li na rézon kan li di pou li La Rényon i pé pa s’an pass kann. Mi pé dir azot sa, pars na poin lontan moin la lir dann nout zournal in sinkantène l’artik dsi kann é mi pans kann sé in gran rishèss pou nou é nou noré bien tor rash nout kann, plito ké transform ali pou dévlop in bon l’indistri dann nout péi.

Mé sanm pou moin li néna tor dann in n’afèr : li di tro vite ni pé pa fé kiltir vivriyèr isi shé nou pars la pèrma kiltir i pèrmète san tro dépansé, san mète l’angré shimik épi tout sort poizon gingn bann bon prodiksyon bon marshé. Sak i fé déor, i pé fé isi galman é sak i vé trouv lo fin-mo pou komansé li sava pran ransègnman dsi l’internet, épi li sava fé l’ésytaz pèrmakiltur, mé li pé mèm fé léstaz dann l’afrik dann in fèrm Songhaï pou li bénéfisyé l’éspèryans banna i fé la-ba dann l’afrik dé l’ouèst.

In n’ot afèr : do ri ! Sa mi mète a par, pars lé posib plant de ri isi La Rényon é pou nout péi lé pti é anplis in il, sé in plantasyon stratézik, mé nou va anparl de sa, an long, an larz épi an travèr. Donk nou va rokozé.