Zot va réponde amwin si sé pou fé in réjime, la pa bézin zète mon manzé i sifi diminyé mon zassyète ; mé la pa sa mi di azot la ! Mi di azot si par égzanp zot néna in rishèss é i propoze azot garde in pé, épi zète lo rèst. Mwin lé sirésèrtin zot va domande amwin si mon tète lé piké.

Bon astèr kan mi di sa kossa mi vé anparl azot ?

Mi vé anparl azot in prodikssyon dopi dé zané é dé zané sé noute prodikssion prinsipal issi la Rényon. Mi vé anparl azot kann. Pou kossa anparlé ? Dabor pars dan la prodiksyon kann konm zot i koné néna konm in malèze. Ni koné la koupe i sava komanssé, é ziska zordi la pankor sign lo konvanssion kann. Zot i koné la CGPER i sorte bate lo poin dsi la tab pars Téréos i vé pa goumante lo pri mèm si li vé vande son prodikssyon pli shèr ké l’ané passé.

Bande plantèr kann i san zot lé étranglé é zot i ariv mèm a domandé si zot va kontinyé plante kann ankor lontan. Arzoute èk sa, zot i koné kann sé in l’or vèr pou la Rényon mé pa pou zot pars néna in salté d’règloman k’i vé ké zot i vande zot prodikssyon, é sak i fé apré-é sak i pé fé apré-i rogarde pa zot.

Poitan mézami nou la fine lir dann Témoignaz i pé tir in kantité sou-produi dan nout l’or vèr. In pé i di san sinkante, mi pans mèm d’apré sak mwin la lir, omoinss sink san é ladan lizinyé i kontante ali troi kate sou-produi, mèm li baze solman dsi dosik épi li zète toute lo réstan – sirman pli inportan ké sak zot i oi konm prinipal, dosik. Sépa si zot i oi kèl gaspiyaz l’apré fé dsi in plantassion la fé transpir demoune zénérassion an zénétrassion.

Alor, i fo arète marsh tète an ba mézami, alon marsh dsi noute dë pyé. Alon fé sak i fo fèr é sirtou arète azi kont lo bon sans.

A bon ékoutèr salu !

Justin