Do sik, nout tout i koné sa : kisoi maron klèr ; kisoi blan, kisoi an poud, kisoi an pti karé bien roganizé dann bann boit an karton, sansa bann boite an tol, épi ankor bien prézanté dann sikriy an kristal konm dann tan bann granmèr kréol. Mé néna galman bann sik éspésyal fé avèk kann, bétrav, sansa d’ot plantaz i pé donn do sik galman. Mi sava pa drèss la list pars néna d’koi, épi sak i vé in répèrtoir bann sik éspésyal mi pans li pé trouv sa dsi l’internet.

Zis rantre nou moin néna dé souvnir : Inn, néna kék zané moin la pass dann in gran sirfas é moin la ropèr plizyèr sik éspésyal, mé la plipar téi sort Maurice, inndé solman téi sort La Rényon. In n’ot souvnir : moin la parti Maurice é moin la fé in pti vizite la kaz lo sik é si mi souvien bien l’av éo moins sète kalité d’sik éspésyal fabriké dann l’il Maurice mèm. Konm de koi banna lété pa an rotar par raport anou, pa an rotar ditou.

M’a site azot zis dé : inn i sort dann sik bétrav i apèl La Vergeoise é in n’ot lé fé avèk kann i apèl casonad. Ni pé site ankor do sik kandi : in bon médikaman pou soign mal de gorj, épi lo rapadura in sik éspésyal la gardien son bann sèl minéro, son bann vitamine, épi z’aside aminé. San konté son mélas épi son bann nitriman. Sé dir sa la pa in sik pou mète solman dann kafé mé in matyèr promyèr pou fé médikaman épi in takonn zafèr, moin lé sir, kan bann roshèrch sar fine fé dsi li.

Moin la poin la plas pou anparl tout bann sik éspésyo, mé si ni vé ni pé nonm ankor bann sik likid, bann sik an jèl i mète pépsine dodan. Bann fason fé sa lé atrtizanl épi familyal é bann prodiksyon lé an pti kantité.

Nb Galabé : Bann zanfan koméla lé bien maléré pi trouv sa dan bann boutik shinoi konm kan moin lété marmaye. Pars galabé, mi pé dir azot sé in vré bonbon, gouté, parfimé, nourisan é tou é tou. A ! Moin la di sé-vèrb o prézan… Moin nora pi dir lété-vèrb o pasé. Pou kosa ? Pars produi-la d’apré sak mi kroi la disparète in bon koup de tan, ziska in famiy la roprann l’afèr pou anvoye sa dann bann gran réstoran parizien pou bann gran shèf fé bann préparasyon ékstra.