Lavé in tan, bann plantèr téi arkomans viv kan la koup kann i ariv. Mèm sa lé dir, mèm si tazantan divé i rant dan la shèr, si fèy i grafine lo bra, la zanm, par issi, par la ba. Té konm in fète : lo kor i rofé, lo kor i rotrouv son zénès, li rotrouv son fièrté. Dann son kèr, la famiy plantèr i di : ni niabou koup kann, nou lé pa fini. Nout tout i antour ! Ni bouz ankor ! Mèm si sé in tié-kor, sé in bon tié-kor !
Alors, kan mi antann, in pé l’apré di i fo fini èk plant kann, i fo mète sa dann mizé, i fo oubli ali. Mon pti pé d’san i bouy. Kossa ? Oubli kane-bonbon, kane tamarin, kane-guingan, kann noir, kann ra gro pans, kann roz, kann blé ? Oubli tousa bann kalité kann, nou téi apèl par z’ot nom, sak la fé nout bonèr, épi sak la mète shagrin dan nout kèr kan in zour la di i fo déplant ali.
Oté, lé ga ! La pa l’èr pou nou rash kann. Pou fé kossa ? Pou plant béton partou. Zot i konpran pa la kriz sa in shans pou bann zil tropikal, in shans armète nout prinsipal kiltir anlèr épi dévlop in nouvo lékonomi : la pa dé sik solman i pé tir la-dan, nana lékime, konpos, kontré-plaké, léléktrésité..in paz la p’assé pou ékri sak i pé fé. Nout lavnir lé la-dan galman ! Kann,sé konm k’i diré in kado Bondié ! Alé, na artrouvé !

Justin