Mwin lé sir galman zot i rapèl sak Moutama lo prézidan la CGPER la déklare kan la di lo minist i vé pa anparl kann dann son sézour :

Li la di i pé konte dsi bande plantèr si i fo pou mète traktère dann shomin.

Roprézantan gouvèrnman la bien konprande lo méssaz é lo minist la pa kite La Rényon san koze avèk linterproféssion. Astèr gouvèrnman i koné bande partnèr dann kann i sava réini pou koze anssanb é sirtou trouv in bon solission pou l’avnir kann issi shé nou.

Bien sir toulmoune i panss pa konmsa é déssèrtin même i di i fo pa diskite avèk toute bande partnèr – sirtou avèk Téréos –, pars dann sète afèr bande plantèr lé riskab d’ète perdan… Mi di azot toute suite mi sava pa diskite dsi la stratézi bande sindika agrikol é dsi la stratézi la CGPER.

Sak mi oi sé ké kann i travèrs inn pèryode frazilité é si i kontinyé konmsa a l’avèg plantatssion-la, prodikssion-la lé riskab disparète issi dann noute péi. Alé oir mi panss kann i doizète sové, dévloppé, transformé épi ète sak li doizète pou nou in l’or vèr… é mi di é rodi, si kann lé dann sète éta-la issi la Rényon la pa son fote – la pa non pli la fote bande plantèr – mé sète in sistème néo kolonyal é lo vré résponsab i doi pa défoss ali dsi lé zot.

Gouvernman i di pa kashète déyèr in sistème li la pa vouli réformé é sa i date pa d’yèr.

Justin