Pou fé dsik, i fo, pou komans koup lo kann pou sépar bann déshé an déor d’kann : lo shou, lo fèye, lo bann zanvlop : i sépar sa dann karo kann, sansa dann sharjman, défoi na ankor kan i manipl ali dann l’izine. Rézilta : avan k’i tir lo ji dann kann sète – la la fine mète dékoté in bone parti son bann ko-produi. Aprésa va ète ankor d’koté lo bagass, épi lo bann bou, lo mélass, lo vinas : in bon tonaz zafèr la pa initil ditou mé i fé pa parti d’lo sik. Dizon sa in bann ko-produi néna shakinn son valèr é lé kant mèm domaz i gaspiye sa konmsa. An tou lé ka sa i anpèsh pa nou anparlé pou konète lo gaspiyaz travaye bann plantèr épi bann travayèr i fé dann travaye kann-la.
Pou sak i intérèss késtyon-la nou va site inn-dé produi i pé tir dann kann san z’ète konplé bien antandi mé kant mèm lé asé konsékan :
Dann in tonn kann néna trois an kilola bagass, soisant dis pour san lo ju i apèl Vesou. Dann vesoi néna : rant 12 épi 18 % sakaroz, épi plis 80 % d’lo. Kan sar fine fé lo sik, é apré lo sar fine évaporé néna ankor trant kilo la mélass (moityé d’sik). Epi bann bou, bann vinas é tousala i mérite ni gard azot avèk in loup pars tousa sé in vré baz pou dévlop nout bann z’indistri é nout l’artizana. Si zot i konpran bien, mi sava pa prézant azot in list plizyèr sa ntène produi mé sifizaman pou zot i rann azot kont sak mi di la pa bann paroil anlèr mé konm mi di in bann baz pou nout révolisyon indistriyèl tré posib.

Vokabilèr : lo byomass pou rosharj mon boutèye lo gaz ?

Mazine in kou si ni ramass tout bann rézidi vèr i sort dann karo kann. Mazine in kou ni mète sa dann kiv pou fèrmanté. Sa i apèl lo métanizasyon : méthane sa in gaz i konbine lidrojène avèk lo karbone. Son formil shimik : CH4 : in l’atome karbone pou kat zatome lidrojène. Li lé pli lézé ké gaz bitane, sansa lo propane-dé gaz lé pa tro bon pars sé in bann gaz i fé l’éfé d’sèr (donk i shof plis lo klima). Konm i pé gingn métane si ou i mète dann lo métanizasyon bann déshé vèr, bann déshé sèk, lo badgass, bann rès la kuizine tondaz gazon. L’èrla, apré an avoir kass mon rinbpou port in boutèye lo gaz inporté, mi di dann mon kèr : Kansa moin nora mon boutèye lo gaz avèk bann rézidi kann métanizé. An touléka, mi trouv i tard in pé.