I antann partou, lo fitir-nouvo prézidann Konsèy réjyonal i sava tras in tré final déssi la MCUR. I prétan dir, sa in n’afèr demoun La Rényon i vé pa, pars lé tro si, pars lé tro sa, é patati é patata. Dèrnyé nouvèl, i prétan i sava mète lo larzan pou rofé lo Lazaret, k’i apartyin Konsèy zénéral, épi lo propriyétèr la pa plèr avèk pèrsone pou li amène son bato par li-mèm, firamézir.
Mi sipoz, lo nouvo-fitir la pa byin mézir koman lé grav désizyon in pé i vé k’i pran. Mi pans zot la pa mézir la mal-konsidérasyon i sava tonm déssi nou, déssi la Frans, vi k’la Rényon sé in réjyon fransèz. Mi pans galman zot i oi pa tro byin kossa i lé l’UNESCO, épi toute bann moun kulturé la fine bate la min pou sa. Pou moin, zot la fine oubliyé lo poi bann péi l’Afrik, l’Inn épi d’ote gran péi ankor.
A sipozé i tras in kroi déssi la MCUR. Zot i doi konète kant mèm, in pé, lo pti préstiz La Rényon nana dan le mond : té dir pou an avoir, lé fasil pou kassé. Mi éspèr zot i gnor pa lo préstiz la Frans nana dann lo mond déssi la késtyonn la kultur, é zot i pé maziné zot i sava fé ékorsh préstiz-la...
In tan, Fron Nasyonal la intèrdi bann liv marksiste dann déssèrtènn bibliotèk. In tan, in moine fou té i apèl Savonarole té i fé bril bann liv té i anparl pa aryink la rolizyon. Tan-la la rotourné ? Kansa i komans fé bann l’auto da fé ?

 Justin