Mi rapèl kan lété la pèryode la shalèr :bann moi konm novanm, désanm, mars-pars mwin la pa konète lékol moi d’févriyé ;téi fé pa sa dann mon tan- kan la shalèr téi shal mi pé dir azot, nou marmaye nou lété maléré,fransh vérité. . .Anplis k’in tanpératir téi dépass lo trant –sink dogré, kan ou té fine manz sak i apèl in gro manjé, mi pé dir azot lété pa gayar ditou : lo kor té lour, ou l’avé konm in l’inprésyon ou téi flote dann lèr sho,épi oute tète lété anbriyé vèye pa koman .Aprann lékol dann sé kondisyon, lété in vré kalvère.
Sa lété dann tan, mé akoz koméla lé ankor konmsa. Koméla lé possib avoir bann sal dé klass avèk vantilatère, sansa ékstraktèr d’èr –do koi fé dsann la tanpératir ziska sink dogré. Mé in pé i vé toute sal dé klass lé klimatizé.Akoz pa si i ansèrv lo rafréshisman par lo d’mèr, par lénèrzi solèr é par toute bann téknik douss néna koméla .Mé i fo kant mèm pa tyé kouyon pou pran son plass :lé kant mèm possib fé lékol dann la méyère sézon.
Mézami,mwin sré pou in plan-in vré plan-pou aménaz bann sal de klass avèk toute bann moiyin néna koméla pou moiyéné. Mé pou sa la bézoin toute la kominoté skolèr i mobiliz, i propoz, é sirtou i lèss pa fèr. Marmaye koméla, épi marmaye domin, la pi bézoin alé lékol konm dann tan zot papa-momon zot granpèr-granmèr épi aryèr aryèr. In pé d’konfor, bann pti marmaye i mérite bien sa kant mèm. Sirtou ké lé possib.