Nana dé kalité d’moun La Rénion : demoun an lèr avèk demoun atèr. Demoun nana lo pourkoi, épi sak na poin... Biensir, na dé foi in pé i fé konmsi zot na poin arien, alé oir la pa vré. Nana ossi i fé konmsi zot lé rish, épi la pa vré non pli... Dann in sosiété, nana touzour in pé i fé sanblan. In pé, mé pa toulmoun !
Gro-gro salèr ? Nana sa. Gro-gro kont la bank ? Nana galman. Gran-gran mézon, konm k’i diré shato ? Nana ossi... Pti salèr ? Sa i mank pa. Moun nana érémi ? Sa i mank pa non pli ! Pti-pti pansion ? Sa i mank pa. Konm diré demoun lontan : in pé néna la fèss an or, épi in bon pé i gingn pa joinn lé dé bout par l’milié.

Nana in prézidan té i anparl la fraktir sosial. Li la trouv in bon mo, mé li la pa trouv in bon solision pou réduir so fraktir-la. An kontrèr ! Épi la pa la politik koméla va shanz lé shoz. Diminié la mizèr ? Avèk in politik masikrok ? Réduir la fraktir sosial ? Avèk in politik an zobok ? Plito dékrosh la line avèk lo dan.
Dizon sa lé konm la lign lorizon : oplis ou i marsh déssi, oplis li lé loin. Mé oplis li lé loin, oplis demoun na difikilté pou viv dann l’armoni, pou viv an parmi... Kansa in bon politik pou bien viv an parmi l’moun ?

Justin