Oté

Kansa nout l’otonomi-sékirité alimantèr ?

Justin / 8 zanvié 2020

JPEG - 43.6 ko

Mé zami, dopi inn-dé zour nou l’apré parl l’anboulkidi i pé spassé dann moiyin-oryan. zot i koné l’amérik l’apré ravaz gèp dann son ni. Li promète l’Iran sinkant-dé bonbardman dsi sinkant-dé landroi frazil.-kite pou fé bann krime kont la kiltir gran péi la é zot i koné sa in krime in zour ou l’ot ou i pèye dovan tribinal pénal internasyonal.
Pou kosa solon zot péi-la i fé konmsi li rode la guèr ?

Inn-dé i di sé pars L’amérik la bézoin kapar bann rishèss lo péi pou li zoué avèk larzan la pa li. Inn-dé i di sé pars l’indistri lé zarm dann l’amérik la bézoin kliyan pars lo bann éstok lé sharjé a blok - in guèr sré lokazyon vid in pé lo bann éstok. I tyé osi d’moun mé sa la pal o traka lo prézidan l’amérik ni sète sak i apèl lo konplèks militaro-indistriyèl.
Sa amenn amoin parl in kékshoz i intérèss anou konm bann péi l’oséan indien nout réjyon - an touléka i doi intérèss anou épi tut bann nasyon insilèr dann lo mond. Mazine in pé la guèr i pète, la guèr mondyal é tout lo bann sirkui komèrsyal lé koupé… Koman nou épi nout bann voizin i fé pou manzé ? Zot i rapèl kan la fé la guèr dann l’Irak bann rényoné in pé plis té i pèrd la tète afors rode ashté manzé épi bataye, bataye é bataye…

Pou lo ka zot la obliyé, mi signal azot néna in poin dann program lo parti i apèl « la sékirité alimantèr » é sa lé bien nésésèr pa sinploman pou nou mé pou tout bannzil nout koté d’loséan indien. An plis sa lé posib é bann plantèr rényoné konm lé zot néna in bon lépèryans dann bann prodiksyon alimantèr.
Alor, kosa i atann ? D’apré zot ? I atann solman bèzman i pète é aprésa va oir.