Oté

Kansa nout latèstasyon dan la lang kréol rényonèz ?

Justin / 2 avril 2021

JPEG - 43.6 ko

Mézami, mèrkrodi mwin la gard in n’afèr dann télé é i fo mi anparl azot. Kossa i lé par l’fète ? Zot i koné laba dann la franss néna lo konfinaz é si wi rode fé kékshoz lé pa otorizé par la loi, tomatikman, i fo wi ranpli in l’atèstasyon dérogatoir. Ni koné sa nou issi pars kan nou lété an konfinaz nou la ranpli bann zatèstasyon-la.

Sak mi di azot la, dizon, sa i kass pa lo kate pate in kanar mé sak lé in pé pli orizinal sé ké lo latèstasyon i pé z’ète ékri dann la lang fransèz-pars d’apré la konstitisyon lo fransé sé la lang nasyonal - mé galman dann toute bann lang lé otorizé zordi dan La Franss pars sa i fé parti o patrimoine La Franss é sa ossi lé marké dann la konstitisyon.

Si tèlman ké laba dann la Normandi lo latèstasyon dérogatoir lé ékri dann la lang franssé épi dann la lang normand in pé i apèl patoi é d’ot i kriye ali lang minoritèr. Lé légal lo zafère, mèm si bann zandarm néna difikilté pou lir kozman-la… Figuir azot néna par-la 70 lang minoritèr dsi lo téritoir fransé é konm lo konfinaz lé zénéralizé dann dé-troi zour pou troi somenn, sré intéréssan oir si nora an pliss lo latèstasyon dérogatoir dann la lang bann fransé, soisant-dis modèle latèstasyon pou toute lo téritoir.

An touléka, mi panss, ni pé konte dsi bann militan band lang réjyonal pou fé lo nésséssèr é konm la bétiz sé lo kékshoz lo pliss partazé dann lo mond, mi panss nora pliss d’in ralé – poussé.. Mé i fo fé avanss lé shoz é sirtou pa rate lo band zokaszyon… Nou na poin konfinaz ziska zordi, donk na poin latèstasyon dérogatoir mé kan n’ora, si n’ora, sèryèzman lé ga, ni sava pa rèss déyèr banna. Mi panss zot i konpran amwin : mi souète pa lo konfinaz mé si néna ? Sar nésséssèr trouv in moiyin pou moiyéné.