Mézami, toultan mi rapèl kozman lo pti prézidan La frans la di avan li karsèr anou shé nou dann nout kaz transformé an prizon pou nou mèm. Li la di a popré kékshoz konmsa : li la di nora forséman in tan d’apré é so tan-la sar pa konm lo tan d’avan. In bon tirad, mé la vérité ousa li lé ladan ?

Toudinkou, firamézir li téi parl, moin téi mète a révé. Moin téi rèv in mond nora pi koni linzistis épi l’inégalité, in mond shakinn noré lo droi viv normalman, in mond nora tir in kroi dsi tout sak mi yèm pa dann mond mi viv. In mond pou mète anlèr la libèrté, l’égalité, épi la fratèrnité. Normal, pars pou moin lo vyé mond tèl ké li lé, mi pans pa li néna in l’avnir pou nout l’imanité.

Mé oila, pétète in pti trépé d’moun konm moin nou lété apré rèv in l’imanité konm ni vé oir nout limanité avèk la mor bann bébète orib konm lo rasism, konm la gèr, konm lésklavaz, la vyolans é tout sak i fé ké nou néna orèr désèrtènn shoz épi ni yèm par avans lo mond ni rèv dopi dé tan é dé tan : i apèl sa l’utopi si zot i vé mé sé lo limanité k’i ral anou.

Mé oila, ni diré oplis i sava oplis lo tan nouvo i éloign é lo tan ansien i rovien. Lo tan d’apré i rosanm plizanplis lo tan d’avan, é lo tan d’avan ni koné ali, é ni koné pou kosa ni yèm pa li : si tèlman li l’apré fatig anou é ni domann dann nout kèr, kansa, ousa so tan d’apré la promète anou v’arivé don.