Gouvèrnman i sort fé in fishié : sète-la i apèl Edvige. Lo nom lé gayar mé lo z’afèr lé pa : dann fishié-la i sava mète lo nom bann moun lé riskab fé dézord in zour. Epi tout bann moun i zoué in rol konsékan dann la sosiété. In drol mélanz, zot i kroi pa ?
Figuir azot, mèm in marmay trèzan, i pé mark son nom la-dan, si l’ariv ali in kanikrosh dann son kartié. Ziskakan ? La pa di si sé pou toultan, sansa solman pou in koup de tan. Aprésa, va mète tout sort kalité délinkan, bann gran, bann moiyin, bann ti... Mèm sak lé pa délinkan zordi, pars na in ka lé in pé dir pou konprann : va mète koté lo nom, lo prénom, l’adrès. L’orientation séksuèl. Sa in déli don sa ? Moin k’i kroyé k’la Frans lété fine fé son révolision séksyèl. La nana konm in lérèr !
A partir si ou lé dann in manifèstassion i shof in pé, out kont lé bon ! Si ou na in difikilté pou ranbours in pré larzan, out afèr lé fé ! Si ou i tonm famiy avèk in rouz de fon, out kanar lé noir ! Si out zamiz sé in zakavouèl, fouti pou ou ! Mé la pa tou sa, lavé déza in fishié pou bann marmay lékol, in fishié bann demoun lé riskab fé lo téroris... Ala zordi nana lo fishié Edvige... Alors, mi di solman : « kansa v’arète fishié d’moun konmsa don ? »

Justin