Zénith ? La komine Sinni la pa fé. Le Pol Aséan ansyin manyèr ? La tras in tré dsi. La plaj Barashoi ? La anvoy dingué. La Rocade Tampon ? La pa fé. La MCUR ? Konsèy réjyonal i vé pi d’sa. Tram-train ? I vé pi non pli. La route an kornish kat voi ? I vé pi fé. La rout an kornish sis voi ? Lé riskab romète sa a la Sin Glin-Glin. In gran route SinPyèr-SinBénoi, la pa ankor domin la vèy.
Mi koné, in pé va di sé la kriz ! É la kriz sa lé mondyal ! Sof ké sa na poin aryin pou oir avèk la kriz, vi k’lo projé té la, larjan té la, bann l’antropriz té la. L’avé la kapasité pou fé. Bin alor, pou kèl rézon la pa fé, sansa i vé pa fé ? In pé toute sorte... Pars i prétan dir lé tro shèr, sansa la pa sir gingn ranboursé, sansa ankor pars sa in projé faraonik, sinon pou in rézon l’idéolozi d’la Droite… Na in ga la di amoin konmsa, i fo pa fé ’pars apré i fo mark lo nom Paul Vergès partou. Mi pans sirtou, pars in pé bann z’assisté d’luks, i konte pa la dsi pou viv, donk lé pa la èk sa. Lé pa la non pli avèk lo konsékans ! Vinn-sink mil travayèr an plis dann shomaj, trann sète mil sink san si i kont sak i travay dann sèrvis tou-otour ! Konm in travayèr i fé viv son famiy, kat pèrsone a pépré, sa i fé san sinkant mil pèrsone, k’i gingn pa viv normalman, k’i ral lo dyab par la ké, k’i kriy siouplé a longuèr d’tan.
Ala déga in pé l’apré fé. Kansa va déside kal azot in pé ?

 Justin